Ons Basiese Benadering: Die Christus-lewe vir Gemeentelewe

1 Kor. 1:30  Maar deur Hom is julle in Christus Jesus, wat vir ons geword het wysheid uit God en geregtigheid en heiligmaking en verlossing.

Col 3:4  Wanneer Christus, wat ons lewe is, geopenbaar word, dan sal julle ook saam met Hom in heerlikheid geopenbaar word.

Volgens die Nuwe Testament kan gemeentelewe nie losgemaak word van die lewe van Christus in die gelowige nie.  Alles wat ons nodig het is in Christus en ons gemeenskap met God en met mekaar is net outentiek en eg solank as wat dit vloei uit ons eenheid met Christus.  Hy is die Hoof en ons is die liggaam en daardie organiese en geestelike eenheid is die basis van gemeentelewe.  Daarom volg dit logies dat ‘n gemeente net gebou kan word vanuit ‘n absolute fokus op ons eenheid met Christus.  Christus in ons is ons lewe volgens Kolossense 3:4 en hierdie hemelse werklikheid is nie net bedoel vir die individu se genieting en opbouing nie, maar ook vir die gemeente.  Ons gemeenskap is in Christus.  Die alternatief is altyd ‘n samekoms rondom persoonlikhede, bedieninge, spesifieke leringe, en ‘n legio ander dinge wat die middelpunt is in so baie gemeentes reg oor die wêreld.  Ons eenheid volgens die Nuwe Testament is egter in Christus.  Dit is net wanneer ons verstaan dat die ‘nuwe skepping’ die locus van ons gemeenskap is dat ons die wonder van gemeentelewe begin sien en waardeer en ontsnap uit sieldodende godsdienstradisies.  Romeine 6 tot 8 is die “broeikas” waar ons geleer word om die ou skepping agter te laat en te leef in die realiteit van ons eenheid met Christus (die nuwe skepping).  Vandaar neem die Here ons na die ‘hoë plekke’ van Kolossense en Efesiërs en neem die heerlikheid net toe.  Hier leer ons om te leef vanuit die Troonkamer (Efes. 2:6; Kol. 3:1-4) en raak gemeentelewe kosbaarder as goud.  Die Christus-lewe is nie net bedoel vir ons eie genieting nie, maar is by uitstek bedoel om gedeel te word met die wat ook dieselfde oorsprong en identiteit het, kinders van God in Christus.  Wanneer ons dit verstaan kan ons aktief en intelligent saamwerk met God se doel in die heelal soos duidelik uitgespel in Efesiërs 2:19-22:

So is julle dan nie meer vreemdelinge en bywoners nie, maar medeburgers van die heiliges en huisgenote van God,  20  gebou op die fondament van die apostels en profete, terwyl Jesus Christus self die hoeksteen is,  21  in wie die hele gebou, goed saamgevoeg, verrys tot 'n heilige tempel in die Here,  22  in wie julle ook saam opgebou word tot 'n woning van God in die Gees.

Dink asseblief na oor die tekste wat volg en vertrou die Here om nuwe dinge vir u oop te maak oor gemeentelewe.

2 Kor. 5:17  Daarom, as iemand in Christus is, is hy 'n nuwe skepsel; die ou dinge het verbygegaan, kyk, dit het alles nuut geword.

Kol 3:11  waar daar nie Griek en Jood, besnedene en onbesnedene, barbaar, Skith, slaaf, vryman is nie, maar Christus is alles en in almal.

Gal. 6:15-16  Want in Christus Jesus het nòg die besnydenis nòg die onbesnedenheid enige krag, maar 'n nuwe skepsel.  16  En mag daar vrede en barmhartigheid wees oor almal wat sal wandel volgens hierdie reël, en oor die Israel van God!

Rom. 12:4-5  Want soos ons in een liggaam baie lede het en die lede nie almal dieselfde werking het nie, 5  so is ons almal saam een liggaam in Christus en elkeen afsonderlik lede van mekaar..

1 Kor. 10:17  Omdat dit een brood is, is ons almal een liggaam, want ons het almal deel aan die een brood.

1 Kor. 12:12-25  Want net soos die liggaam een is en baie lede het, en al die lede van die een liggaam, al is hulle baie, een liggaam is, so ook Christus.  13  Want ons is almal ook deur een Gees gedoop tot een liggaam, of ons Jode of Grieke is, slawe of vrymanne; en ons is almal van een Gees deurdronge.  14  Want ook die liggaam is nie een lid nie, maar baie.  15  As die voet sou sê: Omdat ek nie die hand is nie, behoort ek nie aan die liggaam nie--behoort hy daarom nie aan die liggaam nie?  16  En as die oor sou sê: Omdat ek nie die oog is nie, behoort ek nie aan die liggaam nie--behoort hy daarom nie aan die liggaam nie?  17  As die hele liggaam oog was, waar sou die gehoor wees? As dit geheel en al gehoor was, waar sou die reuk wees?  18  Maar nou het God elkeen van die lede in die liggaam gestel soos Hy gewil het.  19  As almal een lid was, waar sou die liggaam wees?  20  Maar nou is daar wel baie lede, maar net een liggaam.  21  En die oog kan nie vir die hand sê: Ek het jou nie nodig nie; of ook die hoof vir die voete: Ek het julle nie nodig nie.  22  Maar veel eerder is dié lede van die liggaam noodsaaklik wat die swakste lyk;  23  en dié lede van die liggaam wat vir ons minder eerbaar lyk, beklee ons met oorvloediger eer, en so het ons onsierlike lede oorvloediger sierlikheid,  24  terwyl ons sierlike lede dit nie nodig het nie; maar God het die liggaam saamgestel en aan die misdeelde lid oorvloediger eer gegee,  25  sodat daar geen verdeeldheid in die liggaam mag wees nie, maar dat die lede gelyke sorg vir mekaar mag dra.

Efes. 1:23  wat sy liggaam is, die volheid van Hom wat alles in almal vervul.

Efes. 2:16  en albei in een liggaam met God kon versoen deur die kruis, nadat Hy daaraan die vyandskap doodgemaak het.

Efes. 4:4  Dit is een liggaam en een Gees, soos julle ook geroep is in een hoop van julle roeping;

Efes. 4:12  om die heiliges toe te rus vir hulle dienswerk, tot opbouing van die liggaam van Christus,

Efes. 4:15-16  maar, terwyl ons in liefde die waarheid betrag, in alles sou opgroei in Hom wat die Hoof is, naamlik Christus,  16  uit wie die hele liggaam--goed saamgevoeg en saamverbind deur die ondersteuning wat elke lid gee volgens die werking van elke afsonderlike deel in sy mate--die groei van die liggaam bevorder vir sy eie opbouing in liefde.

Efes. 5:30  Want ons is lede van sy liggaam, van sy vlees en van sy bene.

Kol 1:18  En Hy is die Hoof van die liggaam, naamlik die gemeente; Hy wat die begin is, die Eersgeborene uit die dode, sodat Hy in alles die eerste kan wees.

Kol 2:19  en nie vashou aan die Hoof nie, uit wie die hele liggaam deur die gewrigte en verbindinge ondersteuning ontvang en saamgebind word en so met goddelike groei groot word.

Kol 3:15  En laat die vrede van God, waartoe julle ook in een liggaam geroep is, in julle harte heers, en wees dankbaar.

Op grond van hierdie waarhede volg dit logies dat:

• Die kerk nie ‘n gebou is nie, maar ‘n geestelike tempel wat bestaan uit nuwe mense in Christus.
• Die kerk nie ‘n klomp programme is nie, maar lewende gemeenskap met God in Christus.  Programme en organisasie moet dus altyd sekondêr wees.
• Ons primêre onderwerp by samekomste die nuwe skeppingsrealiteite in Christus is.  Die implikasies van die evangelie bly dus altyd sentraal en mag nooit “assume” word nie.
• Alle besprekinge oor ander onderwerpe op hierdie basis geskied en verstaan moet word.
• Die Nagmaal nooit ‘n godsdienstige ritueel mag word nie, maar lewende gemeenskap met Christus moet bly.
• Liturgie, musiek, ensovoorts nooit die toon mag aangee nie, maar slegs praktiese middels bly om op Christus te fokus sodat God Homself aan ons kan openbaar.
• Dit nie in die eerste plek in die gemeente gaan oor sang, preke, leringe, uitreikings, programme, vergaderings, besluite en komitees nie. Dit gaan oor Christus en Sy teenwoordigheid in en onder ons!
• Die kerk dus nie primêr ‘n “soeker-sensitiewe” gemeenskap is nie, maar ‘n “God-sensitiewe” gemeenskap.  Die Christus-lewe is die God-gerigte lewe.
• Ons gemeenskap met die Vader in Christus is.  Deur ons eenheid met Hom, die Seun van God, leer ons die Vader toenemend ken.
• Die primêre bediening van die Heilige Gees is om Christus in ons te openbaar (Jn. 16:14).
• Christus die Hoof is van die gemeente en menslike leiers nooit die fokus op hulleself mag trek nie.
• Christus die Hoof is en die gemeente nie menslike leiers op ‘n troontjie moet sit nie (Mt. 23:6-12)
• Ons mekaar na die gees moet ken en beoordeel (2 Kor. 5:16) en nie op grond van kultuur, klas, kleur, persoonlikheid, gawes of enige ander menslike kategorie nie.
• Alle ware gelowiges Christus in hulle het en daarom gawes en bedieninge het wat met die gemeente gedeel moet word.
• Almal dus geleentheid moet kry om aktief deel te neem aan gemeentelewe.
• Gemeentelewe nooit net ‘n passiewe ontvang kan wees van dit wat ander mense voorberei het nie. Die konsertmentaliteit dus summier verwerp moet word.
• Uitreiking, barmhartigheidsdienste, evangelisasie en sending die gevolg is van dit wat God in die gemeente doen en hoe Hy Homself aan ons openbaar.
• Die gemeente moet dus absoluut en toenemend “heavenly-minded” wees sodat ons vanuit die Allerheiligste die wêreld met die lewe van Christus kan bedien (sien Eseg. 47).  “We do not stand in the world bearing witness to Christ; we stand in Christ bearing witness to the world.”

DNA GROEPE

1. Hoekom DNA Groepe?

DNA molekules bevat die genetiese materiaal vir die funksionering en ontwikkeling van alle lewende organismes.  DNA groepe is dissipelskap groepe van 2 tot 20 mense wat die platform skep vir dissipels van Christus om saam met ander dissipels te groei in gelykvormigheid aan Christus.  Dit is bedoel om die basiese boublokke van ware gemeentelewe te wees en is ook ideal vir gesinne.  Dit stimuleer groei op alle vlakke van dissipelskap.  Dit is gefokus op:

• persoonlike geestelike groei,
• maar saam met ander
• met die oog op meer verhoudingsintimiteit tussen gelowiges,
• meer toerekenbaarheid aan mekaar
• en groter invloed in die wêreld.

Hierdie kort handleiding is ‘n praktiese hulpmiddel wat bedoel is om gelowiges te begelei in die proses van dissipelskap in die gemeente.

2. Bou op die Rots

Ons hele benadering bly deurentyd dat die Christus-lewe die enigste ware basis is vir gemeentelewe.

Meegaande materiaal (sien die "Sermons and Notes" blad):

C  CD 1:  Die Omgeruilde Lewe

C  CD2:  ‘n Gemeente vol Lewe

C  CD3:  Dissipelskap in die Gemeente 1 (Teorie)

C  CD4:  Dissipelskap in die Gemeente 2  (Praktyk)

O  Ons stel voor dat u hierdie CD’s deurwerk met aanvang van die DNA Groepe.

3.  Vier kanale van die Christus-lewe:

Christus leef reeds in elke ware wedergeborene.  Die probleem is dus nie dat ons meer lewe moet ontvang nie, maar dat daar meer vloei van lewe moet wees.  Die volgende vier kanale is bewys reg deur die geskiedenis van die kerk as die manier waardeur God Christus laat uitvloei in die gemeente en na die nasies:

1.  - Die Woord

2.  - Gebed

3.  - Praktiese Gehoorsaamheid

4.  - Uitreiking

Die model wat volg is bedoel om in die gemeente ‘n kultuur te skep wat die lewe van Christus deur bogenoemde vier kanale kan laat vloei. 

Let asseblief daarop dat dit die Gees is wat lewend maak, volgens Johannes 6:63.  Die vlees is van geen nut nie.  Daarom moet elke praktiese punt hier onder biddend benader word in afhanklikheid van en vertroue in die werking van die Heilige Gees.

4. Notas by CD4:  Praktyk van DNA Groepe

1.         Gee terugvoering oor wat jy die vorige week geleer het.

2.         Hoe het dit gegaan met die gehoorsaamheidstappe?

3.         Het jy dit met iemand gedeel?

4.         Het die groep gehoor gegee aan wat die Here vir die groep gesê het?

5.         ‘n Memoriseringsvers.  Hoe het dit gegaan met die memoriseringsvers van            die vorige week?  Let wel dat die memoriseringsvers nie gekies word                      namens die indiwidu nie.    Elkeen besluit self onder leiding van die Gees                watter vers uit die gedeelte hy wil memoriseer. 

6.         Die voorganger  kan een of twee mense vra om hulle vers te kwoteer.

7.         Vra die Heilige Gees om die Woord vir die dag te verlig.

8.         Lees die Gedeelte saam.  Verkieslik een vers per persoon, om                                     deelname te bevorder.

9.         Iemand som die gedeelte op in sy eie woorde.

10.       Bespreek die hele gedeelte.  Watter waarhede staan uit?  Wat spreek jou            persoonlik aan?

11.    Vra stimulerende diagnostiese vrae vir die teks.  Enigeen in die groep kan dit       doen.

12.     Bespreek die gedeelte vers vir vers.

13.    Wat leer die gedeelte ons van God, van die mens en sonde, en van God se         plan in Christus?

14.    Bid saam deur die gedeelte met danksegging.  Die

          voorganger kan begin en dan beweeg die groep vers

          vir vers in gebed deur die gedeelte.

15.     Praktiese Gehoorsaamheidstappe.  “Wat moet ek gaan

          doen?”

16.     Wat sê die Here vir ons as groep uit hierdie gedeelte? 

          Wat moet ons gaan doen?

17.     Met wie gaan jy dit deel?  Vra die Heilige Gees om jou    te lei.

18.     Lofprysing en Aanbidding.  Sing ‘n lied of twee.

19.     Hoe gaan dit met jou?  Waarvoor kan ons vir jou bid?

20.     Sluit af met intersessie vir sake buite die groep: sending

           ensovoorts.

‘n Paar Praktiese riglyne:

- Niemand in die groep mag preek of lering gee nie.  Daar is plek vir lering, maar by ‘n ander geleentheid.

- Bly by die gedeelte onder bespreking en moenie te veel rondspring na ander gedeeltes in die Woord nie.

- Hoor wat die Heilige Gees vir jou sê uit die gedeelte.  Dit is dus nie die plek om ander predikers en leraars se kommentaar op die gedeelte aan te haal nie.

5.  Waar begin ons?

Dit is baie belangrik dat ons die regte fondasie lê van die begin af.  Die volgende teksgedeeltes word voorgehou as ‘n goeie wegspringplek vir u studie saam met die groep.  Dit is ‘n kombinasie van fundamentele waarhede en ‘n inleiding tot die verstaan van die Christus-lewe:

Jes. 53                        Christus, die Lydende Kneg

Johannes 17           Die Allerheiligste

Verse 1-5                   Die Heerlikheid van die Vader en die Seun

Verse 6-19                Die Heerlikheid geopenbaar

Verse 20-26             Die Heerlikheid in eenheid met Christus

Lukas 24:36-53         Goeie nuus vir alle nasies

Matt 28:16-20          Die uitvloei van die Christus-lewe

Hand. 1:1-11            Laaste instruksies van Jesus

Hand. 2:36-47          Die Gemeente vol lewe

Joh. 3:1-16                Die Wedergeboorte

Ef. 2:1-10                   Sekerheid van Saligheid

2 Kor. 3:1-18             ‘n Nuwe Verbond

Ef. 1:3-14                   God se Ewige Voorneme

Kol. 1:15-20              Die Voorrang van Christus

Ef. 1:15-23                 Gebed vir openbaring

Ef. 3:14-21                 Gebed vir krag in Christus

Rom. 3:9-20              Die vlees / Dit wat ons in onsself is

Rom. 8:28-39            Sekuriteit in Christus

Fil. 2:1-8                     Nederigheid in Christus

Fil. 3:1-16                   Om Christus te ken

Rom. 3:21-31            Regverdigmaking

Heb. 10:1-25             ‘n Rein gewete

1 Joh. 1:1-2:2           Gemeenskap met God

1 Kor. 1:18-31           Die wysheid van God

1 Kor. 2:1-16             Openbaring deur die H.G.

Rom. 5:12-21            Die twee Adams

Rom. 6:1-11              Ons identifikasie met Christus

Rom. 8:1-17              Heiligmaking deur die Heilige Gees

Kol. 3:1-17                 Heiligmaking in Christus

Gal. 5:16-26             Wandel deur die Gees

Rom. 8:18-27            Verheerliking / Die verlossing van die liggaam

1 Kor. 13:1-13           Die Doelwit (sien 1 Tim. 1:5)

Efes. 5:18-33             Christus in ons Huis: Mans en Vroue

Efes. 6:1-4                  Christus in ons Huis: Ouers en Kinders